સાબરકાંઠા જિલ્લાના ઇડર તાલુકાના જાદર પોલીસ સ્ટેશનમાં ફરજ બજાવતા હેડ કોન્સ્ટેબલ અને પોલીસ કોન્સ્ટેબલ બંને જણાએ અરજી પરત ખેચવા,ફરિયાદ વિરુદ્ધ થયેલ ત્રણ અરજીઓના નિકાલ માટે અને ફરિયાદીને હેરાન નહિ કરવા માટે રૂ 10 લાખની માંગણી કરી હતી સામે રૂ 4 લાખની લાંચ સ્વીકારીને શંકા જતા ગાડી લઈને નાસી ગયા હતા. એસીબી ગાડી લઈને પીછો કરીને ઇડરના શેરપુર પાસે ખેતરમાંથી કાર મળી આવી હતી. જે એસીબી પોલીસે કાર કબજે લઈને આગળની કાર્યવાહી હાથ ધરી છે.
આ અંગે હિમતનગર એસીબી પોલીસ સ્ટેશનથી મળેલ માહિતી મુજબ ઈડરના જાદર પોલીસ સ્ટેશનમાં ફરીયાદીએ અરજી કરેલ હતી. જે અરજી પરત ખેંચવા, ફરીયાદી વિરૂધ્ધ થયેલ ત્રણ અરજીઓના નિકાલ સારૂ અને ફરીયાદીને હેરાન નહી કરવાના અવેજ પેટે જાદર પોલીસ સ્ટેશનમાં ફરજ બજાવતા હેડ કોન્સ્ટેબલ પિયુષ રામજીભાઇ પટેલે ફરીયાદી પાસે રૂ 10,00,000ની લાંચની માંગણી કરી હતી. જેના સામે બુધવારે રૂ.5,00,000 કે જેટલી વ્યવસ્થા થાય તેટલા નાણાં આપવાનો વાયદો કરેલ હતો. જે લાંચના નાણાં ફરીયાદી આરોપીને આપવા માંગતા ન હોય ફરીયાદીએ ACBનો સંપર્ક કરી ફરીયાદ આપી હતી.
ફરીયાદના આધારે રૂ 4,00,000 સાથે રાખી બુધવારે લાંચના છટકાનું આયોજન કરતાં ઇડરથી હિંમતનગર રોડ ઉપર દરામલી પાસે આવેલ આશિષ હોટેલની સામે આવેલ એચ.પી. પેટ્રોલ પંપની બાજુમાં જાહેર માર્ગ ઉપર હેડ કોન્સ્ટેબલ પિયુષ રામજીભાઇ પટેલે તથા પોલીસ કોન્સ્ટેબલ રમેશજી રાયચંદજી રાઠોડે ફરીયાદી તથા સાહેદ સાથે હેતુલક્ષી વાત-ચીત કરીને લાંચના નાણાંની માંગણી કરી હતી અને લાંચના નાણાં સ્વીકારી આરોપીઓને શંકા જતા લાંચના નાણાં લઈ સાથે લાવેલ GJ.09.BH.2400 ગાડીમાં નાસી ગયા હતા. જેને લઈને એસીબી પોલીસે કારનો પીછો કર્યો હતો અને ઇડરના શેરપુરથી કાર ખેતરમાં મળી આવી હતી. જે એસીબી પોલીસે કબજે લઈને બે સામે ગુનો નોધી આગળની કાર્યવાહી હાથ ધરી છે.
જયંતિ પરમાર સાબરકાંઠા
