વિસાવદરમાં એક તરફી પ્રેમમાં પાગલ પ્રેમીએ મિત્ર સાથે મળી સ્કૂલે જતી સગીરાનું અપહરણ કર્યું

વિસાવદરમાં એક તરફી પ્રેમમાં પાગલ પ્રેમીએ મિત્ર સાથે મળી સ્કૂલે જતી સગીરાનું અપહરણ કર્યું
વાત્સલ્યમ્ સમાચાર
ભરત બોરીચા – જૂનાગઢ
જૂનાગઢ : જિલ્લાના વિસાવદરમાં સગીરાના અપહરણની ઘટના સામે આવી છે. જેમાં ધોરણ 11 માં અભ્યાસ કરતી સગીરા બુધવારે વહેલી સવારે શાળાએ જઈ રહી હતી, ત્યારે કોઈ શખ્સો કાર લઈને આવ્યા અને અપહરણ કરી નાસી ગયા હતા, ત્યારે આ સમગ્ર ઘટના સીસીટીવીમાં કેદ થઇ હતી. જે સીસીટીવીના આધારે પોલીસે આરોપીઓને ઝડપી પાડવા ચક્રોગતિમાન કર્યા હતા. આ અંગે મળતી માહિતી મુજબ વિસાવદરમાં રહેતી અને ધોરણ 11માં અભ્યાસ કરતી સગીરા બુધવારે વહેલી સવારે પોતાની બહેનપણીઓ સાથે શાળાએ જવા નીકળી હતી, ત્યારે જય મયૂર સખાનંદી અને રિયાઝ સલીમભાઈ નાગોરી નામના બે શખ્સો સ્વિફ્ટ કાર લઇને આવ્યા હતા અને સગીરાને આંતરીને બળજબરીથી કારમાં બેસાડી દીધી હતી. આ ઘટના અંગે સગીરાના પિતાને જાણ થતાં તેમણે અપહરણની ફરિયાદ નોંધાવી હતી.
જેના અનુસંધાને પોલીસે સીસીટીવીના આધારે તપાસ હાથ ધરી હતી. ત્યારે પોલીસે સીસીટીવીમાં દેખાતી કાર અંગે તપાસ કરતાં તે કાર રાજકોટના લોધિકા તરફ જતી દેખાઇ હતી. જેથી પોલીસે કાર ઝડપી પાડી હતી. જોકે, ત્યાંથી સગીરા મળી આવી નહોતી. જેથી પોલીસે વધુ તપાસ કરતાં સગીરા અને આરોપી ઝાંઝરડા રોડ નજીક એક એપાર્ટમેન્ટમાં રોકાયાં હોવાનું જાણવા મળતા આરોપીને સગીરા સાથે ઝડપી લીધા હતા.
આ અંગે ડીવાયએસપી હિતેશ ધાંધલ્યાએ જણાવ્યું હતું કે, સગીરાનું ગઇકાલે બે શખ્સોએ અપહરણ કર્યું હતું. જેમાં સીસીટીવી, મોબાઇલ નંબર અને ટેક્નિકલ સર્વેલન્સના આધારે ટ્રેસ કરીને બંને આરોપીને ઝડપી લેવામાં આવ્યા છે. આ અપહરણ એક તરફી પ્રેમમાં થયું હતું. જય મયૂર સખાનંદી સગીરાના એક તરફી પ્રેમમાં હતો, જેણે તેના મિત્ર રિયાઝ સલીમભાઈ નાગોરી સાથે મળીને કારમાં અપહરણ કર્યું હતું.
તેમજ આ અંગે DySP ડીવાયએસપી હિતેશ ધાંધલ્યાએ વધુમાં જણાવ્યું કે, અપહરણ કરનાર જય સુખાનંદીએ પોલીસને ચકમો આપવા કારને લોધિકા તરફ મોકલી દીધી હતી, અને ભોગ બનનાર સગીરા અને આરોપી ઝાંઝરડા રોડ નજીક એક એપાર્ટમેન્ટમાં રોકાયાં હતાં. જેની ધરપકડ કરી વિસાવદર પોલીસ દ્વારા આરોપીઓની પૂછપરછ કરાઇ રહી અને અપહરણની ઘટનાના જે સીસીટીવી ફૂટેજ સામે આવ્યા છે. જેમાં દેખાતી સગીરાની બહેનપણીઓને પણ સાક્ષી બનાવવામાં આવશે.