Rajkot: ચૂંટણી અધિકારી દ્વારા જસદણમાં ઈ.વી.એમ. સેન્ટરની મુલાકાત સાથે ચૂંટણીલક્ષી તૈયારીની સમીક્ષા
તા.૨૯/૪/૨૦૨૪
વાત્સલ્યમ્ સમાચાર
વીરનગર-જંગવડમાં ક્રિટિકલ બુથોની મુલાકાત લઈ સમીક્ષા કરાઈ
જામકંડોરણા, જેતપુર તથા રાજકોટ ગ્રામ્યમાં સઘન મતદાર જાગૃતિ ઝુંબેશ સાથે મતદાન મથકોની સફાઈ
Rajkot: લોકસભાની ચૂંટણી નજીક આવી પહોંચી છે ત્યારે, રાજકોટ જિલ્લા ચૂંટણી અધિકારી શ્રી પ્રભવ જોશી દ્વારા વિવિધ કેન્દ્રોની મુલાકાત લઈને ચૂંટણીલક્ષી તૈયારીઓની સમીક્ષા કરવામાં આવી રહી છે.
જિલ્લા ચૂંટણી અધિકારીશ્રી તથા જિલ્લા કલેકટર શ્રી પ્રભવ જોશી દ્વારા ૭૨-જસદણ વિધાનસભા મત વિસ્તારના ઈ.વી.એમ. પ્રિપેરેશન સેન્ટરની મુલાકાત લેવામાં આવી હતી. જ્યાં તેમણે 5% મુજબ કરવામાં આવતા મોકપોલ, ઈ.વી.એમ.ની તૈયારીઓની વિગતવાર માહિતી મેળવીને જરૂરી માર્ગદર્શન આપ્યું હતું. આ તકે આ વિસ્તારના પ્રાંત અધિકારી સુશ્રી ગ્રીષ્મા રાઠવા પણ હાજર રહ્યા હતા.
જિલ્લા ચૂંટણી અધિકારીશ્રીએ વીરનગર અને જંગવડ ગામે આવેલા ક્રિટિકલ બુથની મુલાકાત લીધી હતી તેમજ હાજર બુથ લેવલ ઓફિસર પાસેથી પોલ ડે મોનીટરીંગ સિસ્ટમની ડ્રાય રન તેમજ “નો યોર પોલિંગ સ્ટેશન” તેમજ “ચુનાવ કી પાઠશાળા” અંતર્ગત કેવા કેવા કાર્યક્રમો કરવામાં આવ્યા છે તેની વિગતો જાણીને સમીક્ષા કરી હતી.
બીજી તરફ આગામી ૭મી મેના રોજ મતદાનના દિવસે મહત્તમ નાગરિકો મતાધિકારનો ઉપયોગ કરીને લોકશાહીના આ અવસરમાં સહભાગી બને તે માટે, જિલ્લા ચૂંટણી અધિકારી શ્રી પ્રભવ જોશીના નિર્દેશ મુજબ સ્વીપ અંતર્ગત સઘન મતદાન જાગૃતિ ઝુંબેશ ચાલી રહી છે.
જે અંતર્ગત, જામકંડોરણામાં સરકારી કચેરીની બહાર મતદાનની પ્રેરણા આપતી રંગોળી કરવામાં આવી હતી. આ સાથે નાગરિકોને અચૂક મતદાન કરવાની અપીલ કરવામાં આવી હતી.
જ્યારે ૭૪-જેતપુર વિધાનસભા મત વિસ્તારમાં આવતા બંધિયા તથા ઉજળા ગામમાં “તમારા મતદાન મથકને જાણો” અંતર્ગત નાગરિકોને મતદાન મથકની મુલાકાત કરાવાઈ હતી. આ સાથે આગામી ચૂંટણીમાં અચૂક મતદાન કરવાના સંકલ્પ લેવામાં આવ્યા હતા.
આ ઉપરાંત ૭૧-રાજકોટ ગ્રામ્ય વિધાનસભા મત વિસ્તારમાં તેમજ અન્ય વિસ્તારોમાં મતદાન મથકોની સફાઈ શરૂ કરવામાં આવી છે.
