જૂનાગઢ પોલીસ તાલીમ મહાવિદ્યાલયની ૬૬૮ મહિલા લોકરક્ષકનો યોજાયો દિક્ષાંત પરેડ સમારોહ
પોલીસ પ્રજાનો મિત્ર છે એ સૂત્રાત્મક રીતે નહીં પરંતુ લોકોને મહેસૂસ થાય તે રીતે ફરજ બજાવવા રેન્જ આઈ. જી. અને પોલીસ તાલીમ મહાવિદ્યાલયનાં પ્રિન્સીપાલ નિલેષ જાજડીયાની શીખ
વાત્સલ્યમ્ સમાચાર
ભરત બોરીચા – જૂનાગઢ
જૂનાગઢ : રાષ્ટ્રવીર છેલભાઈ દવે પોલીસ તાલીમ મહાવિદ્યાલયની ૬૬૮ મહિલા લોકરક્ષકની ૨૦ મી બેંચની આઠ માસની બેઝીક તાલીમ પૂર્ણ થતા બીલખા રોડ સ્થિત રાષ્ટ્રવિર છેલભાઇ દવે પોલીસ તાલીમ મહા વિદ્યાલયના ગ્રાઉન્ડમાં પ્રિન્સિપાલ અને રેન્જ આઇ.જી. શ્રી નિલેષ જાજડીયાના અધ્યક્ષ સ્થાને દિક્ષાંત પરેડ સમારોહ યોજાયો હતો.
આ પ્રસંગે પરેડ નિરીક્ષણ અને માર્ચ-પાસ્ટ બાદ પોલીસ તાલીમ મહાવિદ્યાલયના પ્રિન્સિપાલ અને રેન્જ આઇ.જી. નિલેષ જાજડીયાએ દિક્ષાંત પ્રવચનમાં નવનિયુક્ત મહિલા લોકરક્ષકોને જણાવ્યું હતું કે હવે પુરા શિસ્ત સાથે પોલીસ દળમાં ફરજ બજાવવાની છે ત્યારે હંમેશા બંધારણને વફાદાર રહીને રાષ્ટ્રભક્તિ સાથે કર્તવ્ય બજાવીએ. પોલીસે ગમે તે ઘડીએ સમાજના રક્ષણ માટે હંમેશા તત્પર રહેવાનું છે. મહિલા, બાળકો, વૃધ્ધો અને નિ:સહાય સહાય લોકોની પણ મદદ કરવાની છે. બંદોબસ્તથી માંડીને પ્રોટોકોલ મુજબની કામગીરીની જે તાલીમ આપવામાં આવી છે તેનો અમલ કરીને સમાજસેવામાં સરકારે સોંપેલી ફરજમાં સમર્પિત થવાની શીખ આપી હતી. સાથે ફરજથી ઉપર ઉઠીને પરિવાર સાથે સમય આપવો, વાંચન,રમત અને સેવાકીય બાબતોમાં રસરૂચિ પણ કેળવવા પર ભાર મુક્યો હતો. 
હવે તમારે જે તે જિલ્લામાં ફરજ બજાવવાની છે. તમારી કારકિર્દીનો પ્રારંભ થઇ રહયો છે. જીવનમાં તમારી પ્રગતિ થાય અને મહિલા સશકિતકરણ સાથે તમારે સમાજની અને સરકારની અપેક્ષા પ્રમાણે કાર્ય કરીને તમારા પર સરકારે મુકેલા ભરોસાને સાર્થક કરવાનો છે. લોભ અને લાલચથી દૂર રહીને તટસ્થતાથી ફરજ બજાવવા તેમજ પોલીસ પ્રજાનો મિત્ર છે તે સુત્રાત્મક રીતે નહિં પરંતુ લોકોને અહેસાસ થાય તે રીતે કામ કરવા માર્ગદર્શન આપ્યું હતુ. જયહિંદનાં નારા સાથે જોમ અને જુસ્સો અને દેશ ભકિતની પણ પ્રેરક વાત કરી હતી.
આ તાલીમ દરમિયાન ઇનડોર અને આઉટડોર શ્રેષ્ઠ કામગીરી અને વિશેષ કૌશલ્યથી કામ કરનાર મહિલા લોક રક્ષકોને સર્વ પાયલબેન કનૈયાલાલ ધાંધલ, સવિતાબેન સુરાભાઇ ગોહેલ, પુરીબેન હિમ્મતભાઇ ગોહેલ, સમીરાબેન હનિફભાઇ, શિલ્ડ આપીને આપીને બહુમાન કરવામાં આવ્યું હતું. સમગ્ર તાલીમગાળામાં સર્વશ્રેષ્ઠ તાલીમાર્થી તરીકે શ્રધ્ધાબેન ભાવસિંહભાઇ ગોહેલનું બહુમાન કરવામાં આવ્યુ હતુ. પરેડ કમાંડર કોમલબેન સાગરભાઇ રબારી પરેડનું શ્રેષ્ઠ સંચાલન કરવા બદલ સન્માનિત કરાયા હતા.
કાર્યક્રમની શરૂઆતમાં રાષ્ટ્રગીત, હથિયારધારી અને બિન હથિયાર ધારી મહિલા લોક રક્ષકોની પરેડનું નિરીક્ષણ, શપથ ગ્રહણ, રાષ્ટ્ર ધ્વજ અને યુનીટ ધ્વજ સાથે માર્ચ પાસ્ટ અને પ્રોટોકલ સ્વાગત બેન્ડ સુરાવલી સાથે કરવામાં આવ્યું હતું. પરેડ કમાન્ડર કોમલબેન સાગરભાઇ રબારી ૬૬૮બહેનોનું પરેડનું નેતૃત્વ કર્યુ હતુ. પોલીસ તાલીમ મહાવિદ્યાલનાં નાયબ પોલસ અધિક્ષકશ્રી ગોહિલે તાલીમગાળાની વિગતો આપી જણાવ્યુ હતુ કે આઠ માસની તાલીમ દરમ્યાન તાલીમાર્થિઓને પ્રતિદિન આઠ પીરીયડ તાલીમ આપાતી જેમાં ઈન્ડોર અને આઉટડોર તાલીમ દરમ્યાન કાયદાકીય જ્ઞાન સાથે સઘળા સરકાર કક્ષાએ ઉપલબ્ધ વેપનની જાણકારી અનેતાલીમ આપવામાં આવી હતી.પોલીસ તાલીમ મહાવિદ્યાલયનાં ઉપાચાર્ય એમ.જે.જલુએ જણાવ્યુ હતુ કે હવે તાલીમાર્થી બહેનો તાલીમ પુર્ણ થતાં રાજકોટ શહેર, સુરત શહેર, વડોદરા શહેર, રાજકોટ ગ્રામ્ય, દેવુભમિ દ્વારકા, ગિર સોમનાથ, વગેરે જિલ્લાઓમાં ફરજ નીયુક્ત થશે.
આ કાર્યક્રમમાં જૂનાગઢ જિલ્લા પંચાયતનાં પ્રમુખ હરેશભાઇ ઠુમર, ધારાસભ્ય સંજયભાઇ કોરડીયા, ભગવાનજીભાઇ કરગઠીયા, દેવાભાઇ માલમ,પોલીસ અધિકારીઓ ઉપરાંત તાલીમાર્થીઓના વાલીઓ, જૂનાગઢનાં અગ્રણીઓ અને નગરજનો મોટી સંખ્યામાં ઉપસ્થિત રહયા હતા.
