ચૂંટણી પંચ લોકસભા ચૂંટણી 2024ને લઈને એક્શન મોડમાં હોય તેવું લાગી રહ્યું છે. છેલ્લા કેટલાક દિવસોથી ‘વિકસિત ભારત’ના નામે વોટ્સએપના માધ્યમથી મેસેજ મોકલીને મોદી સરકારનો પ્રચાર કરવામાં આવી રહ્યો હતો. હવે ચૂંટણી પંચે આ મેસેજ પર પ્રતિબંધ લગાવી દીધો છે. કેન્દ્રીય ચૂંટણી પંચે ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયને નિર્દેશ આપતાં કહ્યું કે, દેશમાં આચારસંહિતા લાગુ થયા પછી પણ જો લોકોને વિકસિત ભારત સંબંધિત મેસેજ મોકલાઈ રહ્યા છે તો તેને તાત્કાલિક રોકી દેવામાં આવે. સાથે જ આ અંગે કરવામાં આવેલી કાર્યવાહી બાબતે ચૂંટણી પંચને માહિતી આપવામાં આવે.
આ અગાઉ ચૂંટણી પંચને એવી ઘણી ફરિયાદો મળી રહી હતી કે, લોકસભા ચૂંટણી 2024ની તારીખોની જાહેરાત થયા બાદ અને દેશભરમાં આદર્શ આચાર સંહિતા લાગુ થયા પછી પણ લોકોના મોબાઈલ પર મોદી સરકારનો પ્રચાર કરતા, વિકસિત ભારતના નામના મેસેજ વોટ્સએપના માધ્યમથી મોકલવામાં આવી રહ્યા છે.
