Rajkot: ખંભાળા, નાગવદર ગામમાં મહિલાઓનું મતદાન વધારવા ઝુંબેશઃ શપથ લેવાયા
તા.૧૫/૪/૨૦૨૪
વાત્સલ્યમ્ સમાચાર
રાજકોટ ગ્રામ્ય, વાંકાનેરમાં ઘરે-ઘરે પેમ્ફલેટ વિતરણ કરવા આંગણવાડી કાર્યકરો સાથે બેઠક
Rajkot: લોકસભાની ચૂંટણીમાં રાજકોટ લોકસભા મત વિસ્તારમાં વધુમાં વધુ મતદાન થાય તે માટે, રાજકોટ જિલ્લા ચૂંટણી અધિકારી શ્રી પ્રભવ જોશીના નેતૃત્વમાં જિલ્લાના વિવિધ વિસ્તારોમાં સ્વીપ (સિસ્ટેમેટિક વોટર્સ એજ્યુકેશન એન્ડ ઈલેક્ટોરલ પાર્ટિસિપેશન) હેઠળ મતદાન જાગૃતિના પ્રયાસો ચાલી રહ્યા છે. ખાસ કરીને જે વિસ્તારોમાં પુરૂષ મતદારો કરતાં મહિલા મતદારોનું પ્રમાણ ૧૦ ટકાથી ઓછું હોય તેમજ ગત ચૂંટણીમાં ૫૦ ટકાથી ઓછું મતદાન હોય તેવા લો વોટર ટર્નઆઉટ વાળા વિસ્તારોમાં મતદાન વધારવા માટે વિશેષ ઝુંબેશ ચલાવાઈ રહી છે.
૬૬-ટંકારા વિધાનસભા મત વિસ્તારમાં સમાવષ્ટિ પડધરી તાલુકામાં ખંભાળા ગામ ખાતે મતદાન મથક નં.-૨૮૭ તથા ૨૮૮માં તાલુકા વિકાસ અધિકારીશ્રી તથા બી.એલ.ઓ. દ્વારા મતદાર જાગૃતિ કાર્યક્રમ યોજાયો હતો. જેમાં મહિલાઓને મતદાનનું મહત્ત્વ સમજાવાયું હતું. આ સાથે મહિલાઓની મતદાનમાં ભાગીદારી વધે તે માટે અચૂક મતદાન કરવા અંગે શપથ લેવામાં આવ્યા હતા.
જ્યારે ઉ૫લેટા તાલુકાના નાગવદર ગામે આજ રોજ ઉપલેટાના મતદાર નોંધણી અધિકારી અને મામલતદારશ્રીની અધ્યક્ષતામાં “ચુનાવ પાઠશાળા”નું આયોજન કરવામાં આવ્યું હતું. જેમાં મતાધિકારનું મહત્વ સમજાવાયું હતું. તેમજ સૌએ અચૂક મતદાનના શપથ ગ્રહણ કર્યા હતા.
ઉપરાંત રાજકોટ તાલુકા મામલતદારશ્રી તથા તાલુકા વિકાસ અધિકારીશ્રીના અધ્યક્ષ સ્થાને ૭૧-રાજકોટ ગ્રામ્ય તથા ૬૭- વાંકાનેર મત વિસ્તારમાં, ઓછા મતદાન વાળા ગામના આંગણવાડી બહેનો સાથે મિટિંગ યોજવામાં આવી હતી.જેમાં તેઓને આંગણવાડી ખાતે મતદાર જાગૃતિ કાર્યક્રમ યોજવા સૂચના આપવામાં આવી હતી. જેમાં મહત્તમ સંખ્યામાં મહિલાઓને આવરી લેવા, ઘરે ઘરે પેમ્ફેલેટ વિતરણ કરવા સૂચના આપવામાં આવી હતી.
