તા.૧૯/૧૨/૨૦૨૩
વાત્સલ્યમ્ સમાચાર
અમુ સિંગલ જેતપુર
પ્રાકૃતિક કૃષિના લાભો વર્ણવતી નાટ્ય કૃતિ દ્વારા ખેડુતોને પ્રોત્સાહીત કરાયા
Rajkot, jetpur: રાજકોટ જિલ્લામાં જેતપુર તાલુકાનાં બોરડી સમઢિયાળા ગામે યોજાયેલ વિકસિત ભારત સંકલ્પ યાત્રામાં ગ્રામજનોનું આરોગ્ય વિભાગ દ્વારા નિ:શુલ્ક હેલ્થ સ્ક્રીનીંગ કરવામાં આવ્યું હતું. કેન્દ્ર અને રાજ્ય સરકારની જન કલ્યાણકારી યોજનાઓની જન જન સુધી પહોંચે તે હેતુસર ગામડે ગામડે ફરતા આ રથનું ગ્રામજનોએ સામૈયાં અને કુમકુમ તિલક થકી ઉષ્માભર્યું સ્વાગત કર્યું હતું. હવે પછી આ રથ તા.૨૦ ડિસેમ્બરે રૂપાવટી અને બાવા પીપળીયા, તા.૨૧ ડિસેમ્બરે આરબ ટીંબડી ગામે યોજાશે.
આ કાર્યક્રમમાં પ્રાકૃતિક કૃષિના લાભો વર્ણવતી નાટ્ય કૃતિ દ્વારા ખેડુતોને પ્રાકૃતિક કૃષિ તરફ઼ વળવા માટે પ્રોત્સાહીત કરવામાં આવ્યા હતા. ગામની બે સશકત કિશોરી, છ તેજસ્વી વિદ્યાર્થી, એક સ્થાનિક કલા કારીગર, એક રમતવીરને આ તકે મહાનુભાવોનાં હસ્તે પ્રોત્સાહીત કરવામાં આવ્યા હતા. ઉપસ્થિત અધિકારીઓ દ્વારા સરકારના વિવિધ વિભાગની જનકલ્યાણકારી યોજનાઓની જાણકારી આપવાની સાથે લાભાર્થીઓને ઉજ્જવલા યોજના અન્વયે ગેસ કીટ, આયુષ્માન કાર્ડ, પોષણ કીટનું વિતરણ કરવામાં આવ્યું હતું.
“મેરી કહાની, મેરી ઝુબાની” અંતર્ગત આયુષ્માન કાર્ડ થકી સારવાર મેળવેલ લાભાર્થીઓએ પોતાના પ્રતિભાવો વર્ણવ્યા હતા. જૈવિક ખેતી કરતા રાજુભાઈ પટોળિયા તથા મોહનભાઈ પાઘડાળે વાર્તાલાપ દ્વારા માર્ગદર્શન આપ્યું હતું. ગ્રામ પંચાયત દ્વારા આયુષ્માન કાર્ડની કામગીરી, જન ધન યોજના, જલ જીવન મિશન, પીએમ કિશાન યોજના, ઓડીએફ પ્લસ એટલે કે ખુલ્લામાં શૌચ મુક્ત ગામ સહિત જમીન રેકર્ડ ડીઝીટાઈઝેશનની ૧૦૦% કામગીરી થવા બદલ પ્રશસ્તિપત્ર પણ એનાયત કરવામાં આવ્યા હતા. ગ્રામજનો પ્રધાનમંત્રીશ્રીનો વિકસિત ભારત સંકલ્પ સંદેશ સાંભળવાની સાથે વિકાસલક્ષી શોર્ટ ફિલ્મ નિહાળી, વર્ષ ૨૦૪૭ સુધીમાં ભારતને વિકસિત ભારત બનાવવા યથા યોગ્ય યોગદાન આપવા સંકલ્પબધ્ધ થયા હતા.
આ કાર્યક્રમમાં સરપંચશ્રી ઉર્મિલાબેન બુટાણી, ઉપસરપંચશ્રી દેવુબેન જાદવ, સદસ્યશ્રીઓ અશ્વિનભાઈ સાવલિયા, શ્રી દિપકભાઈ મકવાણા, જિલ્લા પંચાયત સદસ્યશ્રી ભુપતભાઈ સોલંકી, ગ્રામ પંચાયત આગેવાનશ્રીઓ, તાલુકા વિકાસ અધિકારીશ્રી જે.પી.વણપરીયા, વિકસિત ભારત રથ નોડલશ્રી કે.ડી.સખીયા, ખેતીવાડી વિભાગ, બેંક, પશુપાલન, આરોગ્ય, શાળાના આચાર્યશ્રી, શિક્ષકો, તલાટી મંત્રીશ્રી, આઈ.સી.ડી.એસ., સહિતનાં સંબધિત વિભાગના અધિકારીઓ, કર્મચારીઓ તથા ગ્રામજનો ઉપસ્થિત રહ્યા હતા.
