તા.૩/૪/૨૦૨૪
વાત્સલ્યમ્ સમાચાર
Rajkot: લોકસભા સામાન્ય ચુંટણી ૨૦૨૪ને અનુલક્ષીને સ્વીપ અંતર્ગત જિલ્લા ચૂંટણી અધિકારીશ્રી અને અધિક જિલ્લા ચૂંટણી અધિકારીશ્રીનાં માર્ગદર્શન હેઠળ વિવિધ આયોજનો દ્વારા નાગરિકોમાં મતદાન અંગે વધુમાં વધુ જાગૃતિ લાવવા અને મતદાન વધારવા માટે પ્રયાસો કરવામાં આવી રહ્યા છે. આ ઉપક્રમે રાજકોટ વિધાનસભા મતદાર વિભાગના મદદનીશ ચૂંટણી અધિકારીશ્રીના દિશાનિર્દેશ અનુસાર વિસ્તારની વિવિધ શાળાઓ ખાતે મતદાતા જાગૃતિ કાર્યક્રમો યોજાયા હતાં.
ઓ.ઝેડ સંઘવી વિદ્યાલય, શ્રીમતી એમ.એચ. ગાર્ડી ગાયત્રી હાઈસ્કૂલ પાળ, યુનિક શાળા-ધોરાજી, કાલાવડ રોડ રાજકોટ, સરકારી કન્યા વિદ્યાલય –ધોરાજી ખાતે મતદાન અંગેના જાગૃતિ કાર્યક્રમો ઉપરાંત મતદાન જાગૃતિ માટેનું નાટક કે.જે. કોટેચા ગર્લ્સ હાઈસ્કૂલમાં કરવામાં આવ્યું હતું. વિવિધ શાળાઓમાં મતદાનલક્ષી કાર્યક્રમનું આયોજન કરી લોકશાહીને ધબકતી રાખવા મતદાન કરવું આવશ્યક છે તેવું વિદ્યાર્થીઓને સમજાવવામાં આવ્યું હતું. લોકશાહીમાં ભાગ લઈને તેને મજબુત બનાવવા માટે ૧૮ વર્ષની વયે મતદાર યાદીમાં નામ નોંધાવવા તેમજ દરેક વખતે અચૂક મતદાન કરવા વિદ્યાર્થીઓને જાગ્રુત કરવામાં આવ્યા હતા. વધુમાં વિદ્યાર્થીઓ ૭ મે ના રોજ મતદાન કરવા માટે પોતાના પરિવારજનોને પ્રેરિત કરે તેવી અપીલ કરવામાં આવી હતી.
