શેરબજારમાં બુધવારે બાજી બગાડી નાંખી છે. ( Stock Market ) શેરબજાર ખુલતાની સાથે જ ઝડપથી તૂટવા લાગ્યું. આજે સેન્સેક્સમાં 1000 પોઈન્ટનો ઘટાડો થયો હતો જ્યારે નિફ્ટીમાં 350 પોઈન્ટનો ઘટાડો થયો હતો. બપોરે 2.30 વાગ્યે સેન્સેક્સ 1,046 પોઈન્ટ અથવા 1.42% ડાઉન થઈને 72,621 ના સ્તરે ટ્રેડ થઈ રહ્યો હતો, જ્યારે નિફ્ટી 1.74% અથવા 388 પોઈન્ટના ઘટાડા સાથે 21,947 પર ટ્રેડ થઈ રહ્યો હતો.
નિફ્ટીના મિડકેપ ઈન્ડેક્સમાં 1730 પોઈન્ટ અથવા 3.61 ટકાનો ઘટાડો જોવા મળ્યો હતો. સાથે જ નિફ્ટીના સ્મોલકેપ ઈન્ડેક્સમાં 676 પોઈન્ટ અથવા 4.50 ટકાના ઘટાડા સાથે ટ્રેડ થઈ રહ્યો છે. BSE સ્મોલકેપ ઈન્ડેક્સ 1824 પોઈન્ટ અને મિડકેપ ઈન્ડેક્સ 1382 પોઈન્ટના ઘટાડા સાથે ટ્રેડ થઈ રહ્યો છે. આ તીવ્ર ઘટાડાને કારણે બજારના ગણિતો ફેરવાઈ ગયા છે. મોટી કંપનીઓના શેરમાં જોરદાર વેચાણ જોવા મળ્યું હતું.
થોડા દિવસ પહેલા જ સેબી ચીફે મિડકેપ અને સ્મોલ કેપ શેરો અંગે ચિંતા વ્યક્ત કરી હતી. તેમણે કહ્યું હતું કે સેબી આ બાબતો પર ચાંપતી નજર રાખી રહી છે. મિડકેપ અને સ્મોલકેપ શેરોમાં હેરાફેરીના સંકેત મળ્યા છે. SMI IPOમાં પણ અનિયમિતતાના સંકેતો છે. સેબી ચીફે રોકાણકારોને આ અંગે સાવચેત રહેવા જણાવ્યું છે. સેબીના આ નિવેદન બાદ બજારનું સેન્ટિમેન્ટ બદલાઈ જતાં આજે બજારમાં ભારે વેચવાલી જોવા મળી. સ્મોલ કેપ અને મિડકેપ ઈન્ડેક્સની સાથે અન્ય ઈન્ડેક્સમાં પણ જોરદાર ઘટાડો જોવા મળ્યો છે.
બુધવારે શેરબજારમાં ભારે ઘટાડાના કારણે BSE લિસ્ટેડ કંપનીઓની માર્કેટ કેપ રૂ. 12.67 લાખ કરોડ ઘટીને રૂ. 372 લાખ કરોડ રૂપિયા થઈ હતી. અર્થાત્ થોડા જ કલાકોમાં રોકાણકારોને લગભગ 13 લાખ કરોડ રૂપિયાનું નુકસાન થયું છે.
અદાણીના શેરો તૂટવાનેકારમે અદાણી ગ્રૂપની માર્કેટ કેપ રૂપિયા 90,000 કરોડ સુધી ઘટી ગઈ હતી. ગૌતમ અદાણી 100 બિલિયન ડોલરની ક્લબમાંથી બહાર થઈ ગયા હતા. બુધવારે અદાણીના તમામ શેર્સમાં ઘટાડો જોવા મળ્યો હતો, જેમાં અદાણી ગ્રીન એનર્જીના શેરમાં સૌથી વધુ 9 ટકાનો ઘટાડો થયો હતો. આ સિવાય અદાણી ટોટલ ગેસ 7%, અદાણી એન્ટરપ્રાઇઝ 6%, અદાણી વિલ્મર 4%, અદાણી પોર્ટ 5%, અદાણી ગ્રીન સોલ્યુશન 4.5% અને અદાણી પાવર 5% ઘટ્યા હતા. શેરોમાં ઘટાડાને કારણે ગૌતમ અદાણીની નેટવર્થ ઘટીને $99.9 બિલિયન થઈ ગઈ છે.
