તમિલનાડુ પોલીસે ગુરુવારે મદ્રાસ હાઈકોર્ટને માહિતી આપી હતી કે 2016થી કોઈમ્બતુરના ઈશા ફાઉન્ડેશન (Isha Foundation)માંથી છ લોકો ગુમ થઈ ગયા છે. પોલીસે કોર્ટને એમ પણ જણાવ્યું કે ગુમ થયેલા કેસોની તપાસ ચાલી રહી છે.
લાઈવ લોના અહેવાલ અનુસાર જસ્ટિસ એમએસ રમેશ અને જસ્ટિસ સુંદર મોહનની બેન્ચ સમક્ષ આ રજૂઆતો કરવામાં આવી હતી. બેંચ તિરુનેલવેલી જિલ્લાના થિરુમલાઈએ તેના ભાઈ ગણેશનના મૃતદેહને રજૂ કરવા માટે દાખલ કરવામાં આવેલી હેબિયસ કોર્પસ અરજીની સુનાવણી કરી રહી હતી.
એડિશનલ પબ્લિક પ્રોસિક્યુટરે કોર્ટને માહિતી આપી હતી કે પોલીસ આ મામલે તપાસ કરી રહી છે અને કેટલાક કિસ્સાઓમાં ગુમ થયેલા લોકો પરત આવી ગયા હશે પરંતુ વિગતો ઉપલબ્ધ નથી. કોર્ટે પોલીસને 8મી એપ્રિલ સુધીમાં સ્ટેટસ રિપોર્ટ દાખલ કરવા જણાવ્યું હતું અને કેસની સુનાવણી મુલતવી રાખી હતી.
થિરુમલાઈ નામના ખેડૂતે માર્ચ 2023માં તેનો ભાઈ ગણેશન ગુમ થયા બાદ કોર્ટનો સંપર્ક કર્યો હતો. થિરુમલાઈએ કોર્ટને માહિતી આપી હતી કે તેનો ભાઈ ઈશા યોગ કેન્દ્રમાં ચેરિટી વર્ક કરી રહ્યો હતો અને 2 માર્ચ, 2023ના રોજ, જ્યારે તેણે યોગ કેન્દ્રનો સંપર્ક કર્યો કે તેનો ભાઈ કેન્દ્રમાં છે કે કેમ, તેને જાણ કરવામાં આવી કે ગણેશન 2 દિવસથી કેન્દ્રમાં આવ્યો નથી.
તેમણે કહ્યું કે યોગ કેન્દ્રના ઈન્ચાર્જ દિનેશની ફરિયાદના આધારે પોલીસમાં ફરિયાદ નોંધાવવામાં આવી હોવા છતાં પોલીસે કોઈ કાર્યવાહી કરી ન હતી અને ઉદ્ધતાઈભર્યું વર્તન કર્યું હતું. આમ, અન્ય કોઈ વિકલ્પ ન હોવાથી, તિરુમલાઈએ હેબિયસ કોર્પસ અરજી સાથે મદ્રાસ હાઈકોર્ટનો સંપર્ક કર્યો.
