તા.૨૮ માર્ચ
વાત્સલ્યમ્ સમાચાર
અમુ સિંગલ જેતપુર
વિજેતા મહિલાઓ તથા બાળકોને ઇનામો આપી પ્રોત્સાહિત કરાયા
રાજકોટ જિલ્લા પંચાયત અંતર્ગત સંકલિત બાળ વિકાસ યોજના કચેરી દ્વારા પોષણ પખવાડિયાની ઉજવણી નિમિત્તે ધોરાજી ખાતે આંગણવાડીમાં તાલુકાકક્ષાની ‘મિલેટ્સ ફૂડ’ તથા ‘સ્વસ્થ બચ્ચા’ સ્પર્ધા યોજાઈ હતી. જેમાં વિજેતા મહિલાઓ તથા બાળકોને ઇનામો આપી પ્રોત્સાહિત કરાયા હતા.
રાજકોટ જિલ્લા સંકલિત બાળ વિકાસ યોજના કચેરીના પ્રોગ્રામ ઓફિસરશ્રી સાવિત્રીબેન નાથજીના માર્ગદર્શન મુજબ પોષણ પખવાડા અંતર્ગત ધોરાજી ઘટકમાં આંગણવાડી ખાતે મિલેટ્સ ફૂડ કોમ્પિટિશનનું આયોજન કરાયું હતું. જેમાં આંગણવાડીની લાભાર્થી મહિલાઓએ મિલેટ્સ (શ્રીધાન્ય)માંથી બનાવેલી અવનવી વાનગીઓ રજૂ કરી હતી. તેમજ ઉપસ્થિત લોકોને મિલેટ્સમાંથી મળતા પોષણના લાભો વિશે માહિતી આપવામાં આવી હતી તથા મિલેટ્સનો વધુમાં વધુ ઉપયોગ કરવા અનુરોધ કરવામાં આવ્યો હતો.
વધુમાં, પોષણ પખવાડા અન્વયે ‘સ્વસ્થ બચ્ચા’ સ્પર્ધાનું પણ આયોજન કરાયું હતું. જેમાં આંગણવાડીના લાભાર્થી બાળકોને ઉંમરના પ્રમાણમાં યોગ્ય વજન અને ઊંચાઈના માપદંડને આધારે નિર્ણય લેવાયો હતો. આ બંને સ્પર્ધાઓના એકથી ત્રણ સ્થાનના વિજેતાઓને ઈનામ આપી પ્રોત્સાહન પૂરું પાડ્યું હતું. તેમજ મહિલાઓને પૂર્ણાશક્તિ, માતૃશક્તિ અને બાળશક્તિના પેકેટસનું વિતરણ કરીને પૂર્ણા દિવસની ઉજવણી કરાઈ હતી.
આ તકે ધોરાજી તાલુકા બાળ વિકાસ યોજના અધિકારીશ્રી શોભનાબેન લાડાણી, ડિસ્ટ્રીકટ પ્રોજેક્ટ આસિસ્ટન્ટશ્રી શ્વેતાબેન રૈયાણી, ધોરાજીના મેડિકલ ઑફિસર્સશ્રી કૃપાબેન નંદાણીયા અને ફોરમબેન જાગાણી ઉપસ્થિત રહ્યાં હતાં.
