ગોંડલના ધારાસભ્યના પુત્ર સામે હત્યાના પ્રયાસની ફરિયાદ

ગોંડલના ધારાસભ્યના પુત્ર ગણેશ જાડેજા સહિતની ટોળકી સામે જૂનાગઢમાં અપહરણ અને હત્યાના પ્રયાસની કલમો હેઠળ ગુનો નોંધવામાં આવ્યો છે. જૂનાગઢ NSUI પ્રમુખનું ત્રણ કારમાં અપહરણ કર્યા બાદ ગોંડલના ‘ગણેશગઢ’ ખાતે લઈ જઈ આરોપીઓએ ભોગ બનનારનાં કપડાં કાઢી ઢોર માર માર્યો હતો અને તેનો વીડિયો બનાવી વાઈરલ કરવાની ધમકી આપી હતી. ભોગ બનનારને ઢોર માર મારી જૂનાગઢમાં ઉતારી આરોપી નાસી છૂટ્યા હતા. આ મામલે ભોગ બનનાર દ્વારા ગણેશ જાડેજા સહિતના આરોપીઓ સામે ગુનો નોંધાવતા પોલીસે વધુ તપાસ હાથ ધરી છે.

મને ઢોર માર મારી કારમાં ઉઠાવી ગોંડલ તરફ લઈ ગયા- ભોગ બનનાર

ભોગ બનનાર સંજય રાજુભાઈ સોલંકીએ ફરિયાદ આપતા જણાવ્યું હતું કે, હું અને મારો છોકરો 30 તારીખે રાત્રે કાળવા ચોકમાંથી પસાર થઈ રહ્યા હતા ત્યારે કાળુભાના પૂતળા પાસે પહોંચતા પાછળથી એક ફોર વ્હીલર કાર એકદમ સ્પીડમાં આવેલ અને મારી નજીક પહોંચી બ્રેક મારી હતી. જેથી મેં કારચાલકને વ્યવસ્થિત ચલાવવાનું કહેતા તે લોકોએ ઝઘડો કરવાનો પ્રયાસ કર્યો હતો. પરંતુ, મારો છોકરો મારી સાથે હોઇ મેં કહ્યું હતું કે, હું મારા છોકરાને ઘરે મૂકીને આવું છું. ત્યારબાદ હું મારી બાઈક લઈને ત્યાંથી રવાના થઈ ગયો હતો અને મારા ઘર પાસે પહોંચતા આ ફોર વ્હીલરનો ચાલક અને તેની સાથે બીજી એક ફોર વ્હીલર મારી પાછળ મારા ઘર પાસે આવી હતી. આ બંને કારમાંથી આશરે દશેક માણસો નીચે ઊતર્યા હતા અને મારી સાથે ઝઘડો કરવાની તૈયારીમાં હતા તેવામાં મારા પિતા આવી ગયા હતા. આ કારમાં એક માણસ બેઠો હતો જે માણસને જોતા આ માણસ ગોંડલનો ગણેશ જયરાજસિંહ જાડેજા હતો. તેને હું ઓળખી ગયેલ અને તેની સાથે તેના બીજા માણસો હતા તેને હું ઓળખતો નથી. પરંતુ, મને બતાવવામાં આવે તો જોયો ઓળખી શકું છું. ત્યારે ગણેશ જાડેજાને મારા પિતા ઓળખતા હોવાથી અમારા વચ્ચે મારા પિતાએ સમાધાન કરાવેલ અને આ લોકો જતા રહ્યા હતા. ત્યારબાદ હું રાત્રિના સમયે મારા ઘર પાસેથી બાઈક પર જઈ રહ્યો હતો ત્યારે આ લોકો ફરી પોતાની ફોર વ્હીલર કારમાં ધસી આવ્યા હતા અને અને મારી મોટર સાઇકલને ટક્કર મારી મને નીચે પછાડી દીધો હતો. કારમાંથી પાંચેક શખ્સોએ નીચે ઊતરી મને લોખંડના પાઈપ વડે મારવા લાગ્યા હતા. તેની પાછળ પણ બે કાર આવી હતી. તેમાંથી પણ માણસો નીચે ઊતર્યા હતા અને મને ઉપાડીને કારમાં બેસાડી દીધો હતો અને કારને ગોંડલ બાજુ લઈ ગયા હતા.

મને નગ્ન કરી મારો માફી માગતો વીડિયો બનાવ્યો- સંજય સોલંકી

એક અવાવરું વાડી વિસ્તારમાં લઈ ગયા હતા અને ત્યાં નીચે ઉતાર્યો હતો. ત્યારે ગણેશ જાડેજા અને તેના માણસો હાજર હતા અને આ લોકો મને માર મારતા હતા અને મારી જાતિ વિષે ખરાબ ટિપ્પણીઓ કરી હતી. ત્યારબાદ ગણેશે મને પાછો તેની કારમાં બેસાડી દીધો હતો અને ગોંડલ તેના ઘરે ગણેશગઢમાં લઈ ગયા હતા. ત્યાં પણ પાંચ છ માણસો હાજર હતા. ત્યારે ગણેશના માણસોના હાથમાં પિસ્તોલ જેવા હથિયાર અને લોખંડના પાઈપ હતા. આ ગણેશ જાડેજાના માણસો મને તેની ઓફિસમાં લઈ ગયેલ અને ગણેશના કહેવાથી તેના માણસોએ મારાં કપડાં કાઢી નાખેલ હતાં. મને આડેધડ ઢીકાપાટુનો માર મારેલ હતો અને તેનો વીડિયો તેના મોબાઈલમાં ઉતારી લીધો હતો અને મારી પાસે માફી મંગાવેલ અને કહેલ કે, જૂનાગઢ NSUI કોંગ્રેસમાંથી રાજીનામું આપી દેજે અને આ બાબતે જો તું ફરિયાદ કરીશ તો તને જાનથી મારી નાખીશું તેમ ધમકી આપેલ હતી. ત્યારે મેં આ લોકો પાસે માફી માંગલે હોય જેથી તેઓએ મને પાછો એક ફોર વ્હીલ કારમાં બેસાડી દીધેલ અને જૂનાગઢ ભેંસાણ ચોકડી કિયાના શોરૂમ પાસે ઉતારીને જતા રહ્યા હતા.

ગોંડલના ધારાસભ્યના પુત્રએ મારા પુત્ર પર હુમલો કર્યો- રાજુભાઈ સોલંકી

ફરિયાદીના પિતા રાજુભાઇ સોલંકીએ જણાવ્યું હતું કે, ગઇકાલે ત્રણ વાગ્યે જૂનાગઢ દાતાર રોડ વિસ્તામાંથી મારા છોકરાનું ગોંડલના ધારાસભ્ય ગીતાબેન અને પૂર્વ ધારાસભ્ય જયરાજસિંહ જાડેજાનો દીકરો ગણેશ અને એના માણસો ત્રણ ફોર વ્હીલરમાં અપહરણ કરી ગયા હતા. બાદમાં ‘ગણેશગઢ’માં લઇ જઇ મારા છોકરાને નગ્ન કરીને માર માર્યો હતો. બાદમાં જાનથી મારી નાખવાની ધમકી આપી પાછો જૂનાગઢ ભેંસાણ ચોકડી ઉતારી દીધો હતો. આ અંગે અમે જૂનાગઢ પોલીસને જાણ કરી પોલીસને સીસીટીવી પણ આપ્યા છે. શું ઘટના હતી એ અંગે રાજુભાઇ સોલંકીએ જણાવ્યું કે, મારો છોકરો અને મારા છોકરાનો છોકરો કાળવા ચોંકમાંથી જતા હતા, ત્યારે આ લોકો ફોર વ્હીલર લઇને નીકળ્યા હતા, ત્યારે મારા છોકરાએ ધીમે ચલાવાનું કહેતા ઝઘડો થયો હતો. આ અંગે અમે જયરાજસિંહના છોકરા સહિત 10 લોકો સામે ફરિયાદ નોંધાવી છે.

શું કહી રહી છે પોલીસ?
ડીવાયએસપી હિતેષ ધાંધલ્યાએ જણાવ્યું હતું કે, ગણેશ જાડેજા સહિતના 10 લોકો સામે ગુનો નોંધવામાં આવ્યો છે. ભોગ બનનારનું જૂનાગઢમાંથી અપહરણ કરી ગોંડલ તરફ લઈ ગયા હતા. આરોપીઓ સામે એટ્રોસિટી, હત્યાનો પ્રયાસ, અપહરણ, રાયોટિંગ સહિતની કલમો હેઠળ ગુનો નોંધવામાં આવ્યો છે. એલસીબી, એસઓજી સહિતની ટીમો બનાવી આરોપીઓની શોધખોળ હાથ ધરવામાં આવી છે.