નેપાળમાં શુક્રવારે રાત્રે આવેલા ભૂકંપથી ભારે તબાહી સર્જાઈ છે. આ શક્તિશાળી ભૂકંપમાં ઓછામાં ઓછા 150થી વધુ લોકોના મોત થયા હતા અને ડઝનેક લોકો ઘાયલ થયા હતા. અધિકારીઓનું કહેવું છે કે મૃત્યુઆંક વધવાની શક્યતા છે. આટલા લોકોના મોતનું કારણ એ છે કે જ્યારે ભૂકંપ આવ્યો ત્યારે લોકો પોતાના ઘરમાં સૂતા હતા અને તેમની પાસે બહાર નીકળીને પોતાનો જીવ બચાવવાની તક જ નહોતી.
એટલું જ નહીં, ભૂકંપ એટલો શક્તિશાળી હતો કે તેના આંચકા ભારતની રાજધાની દિલ્હીમાં પણ અનુભવાયા હતા. નેશનલ સેન્ટર ફોર સિસ્મોલોજી (NCS) એ જણાવ્યું હતું કે ભૂકંપનું કેન્દ્ર 10 કિમીની ઊંડાઈએ હતું. જાજરકોટ કાઠમંડુથી પશ્ચિમમાં લગભગ 500 કિલોમીટર દૂર છે. ભૂકંપના આંચકા અનુભવાતા જ કાઠમંડુમાં લોકો ઘરની બહાર આવી ગયા હતા.
નેપાળના રાષ્ટ્રીય ધરતીકંપ માપન કેન્દ્રના અધિકારીઓના જણાવ્યા અનુસાર, ભૂકંપ રાત્રે 11.47 વાગ્યે આવ્યો હતો, જેનું કેન્દ્ર જાજરકોટમાં ભૂગર્ભમાં 10 કિલોમીટરની ઊંડાઈમાં હતું. ભૂકંપની અસર ભારત અને ચીનમાં પણ જોવા મળી હતી. ભારતમાં પણ લગભગ 40 સેકન્ડ સુધી ભૂકંપના આંચકા અનુભવાયા હતા.
પડોશી રુકુમ પશ્ચિમ જિલ્લાના પોલીસ અધિકારી નામરાજ ભટ્ટરાઈએ રોઇટર્સને જણાવ્યું: “અમે અહેવાલોને સમર્થન આપ્યું છે કે એથબિસ્કોટ ગામમાં એક જ પરિવારના પાંચ લોકોના મોત થયા છે અને વધુ મૃત્યુના અહેવાલો છે.” અધિકારીએ કહ્યું કે જો કે આ વાતની પુષ્ટિ થઈ શકી નથી. રોઇટર્સના જણાવ્યા અનુસાર, જાજરકોટમાં મીડિયા ફૂટેજમાં બહુમાળી ઈંટની ઈમારતોના તૂટી પડેલા ભાગો દેખાય છે. રહેવાસીઓએ જણાવ્યું કે આંચકા પડોશી જિલ્લાઓ અને કાઠમંડુ સુધી અનુભવાયા હતા.
નેપાળના વડાપ્રધાન પુષ્પ કમલ દહલ પ્રચંડે ભૂકંપના કારણે જાનમાલના નુકસાન પર શોક વ્યક્ત કર્યો છે. નેપાળના પીએમઓએ ટ્વીટ કર્યું, વડાપ્રધાન પુષ્પ કમલ દહલે શુક્રવારે રાત્રે 11.47 કલાકે જાજરકોટના રામીદાંડામાં આવેલા ભૂકંપના કારણે જાનહાનિ અને મકાનોના નુકસાન પર ઊંડું દુઃખ વ્યક્ત કર્યું છે. ઘાયલોને તાત્કાલિક બચાવ અને રાહત માટે ત્રણેય સુરક્ષા એજન્સીઓને તૈનાત કરવામાં આવી છે.
