Ramesh Savani : સરકાર શરમ-સંકોચ એક બાજુએ મૂકીને, ધનવાન ઉદ્યોગપતિને જેલમુક્ત કરવા ઉત્સુક બની ગઈ નથી?

જયસુખ પટેલને જામીન મળે તે માટે ગુજરાત સરકારે પરિશ્રમ ઊઠાવ્યો છે. સરકારી વકીલે હાઈકોર્ટને કહ્યું હતું કે “1. જયસુખ પટેલ નાસી છૂટે એવો આરોપી નથી. 2. જયસુખ પટેલને જામીન મળે તેમાં સરકારને કોઈ વાંધો નથી. 3. ચાર્જફ્રેમમાં લાંબો સમય લાગે તેમ છે. તેમજ કેસમાં ઘણા બધા સાક્ષીઓ હોવાને કારણે સમય લાગે એમ છે. 4. જયસુખ પટેલ જેલમાં રહેવાથી ઉદ્યોગો પર અસર પડી રહી છે.”

બીજી તરફ કોંગ્રેસના નેતાઓ લલિત કગથરા, લલિત વસોયા અને ડૉ. કિરીટ પટેલે પત્રકાર પરિષદ યોજી કહ્યું હતું કે દુર્ઘટના બાબતે SITનો રિપોર્ટ એક તરફી છે. મોરબી કલેક્ટર, નગરપાલિકાના ચીફ ઓફિસર વિરુદ્ધ કાર્યવાહી કરવી જોઈએ.”

થોડાં પ્રશ્નો : [1] 135 લોકોના જીવ કરતાં ગુજરાત સરકારને આરોપી જયસુખ પટેલની ચિંતા વધુ છે ! સરકારને નાગરિકોની જિંદગીની કોઈ કિંમત નથી, ઉદ્યોગપતિ જેલમાં રહે તો સરકાર ચિંતામાં મૂકાઈ જાય છે ! સરકારનું આવું વલણ યોગ્ય છે? શું સરકાર આવું કરી શકે? [2] બળાત્કારીઓ/હત્યારાઓ ‘સંસ્કારી’ અને ‘ઉચ્ચવર્ણના હતા અને વિકિટિમ લઘુમતી વર્ગના હતા ત્યારે સરકારે બળાત્કારીઓ/હત્યારાઓને જેલમુક્ત કરી દીધા હતાં ત્યારે બહુમતી હિન્દુઓએ વાંધો ઊઠાવ્યો ન હતો. પરંતુ લઘુમતીને અન્યાય કરનાર સરકાર જ્યારે જેલનિવાસી ઉદ્યોગપતિની તરફેણ કરે ત્યારે આંખ ખૂલવી જોઈએ કે નહીં? [3] આરોપીને જામીન ન મળે તે માટે સરકારી વકીલે કામ કરવાનું હોય છે, આ કિસ્સામાં સરકારી વકીલ જ આરોપીની તરફેણ કરે છે ! જો સરકારી વકીલનું આવું ચરિત્ર હોય તો આરોપી જયસુખ પટેલને સજા થાય ખરી? [4] ‘નાસી છૂટે તેવો આરોપી નથી’, એવું પ્રમાણપત્ર સરકાર આપી શકે? જયસુખ પટેલ કરતા વધુ સંપત્તિવાળા દેશ છોડીને વિદેશમાં સ્થાયી થઈ ગયા નથી? [4] ‘જયસુખ પટેલને જામીન મળે તો સરકારને વાંધો ન હોય’ તો કોઈ ગરીબ/વંચિતને જમીન ન મળે તે માટે સરકાર શામાટે પ્રયત્નશીલ રહે છે? [5] ‘ચાર્જફ્રેમમાં લાંબો સમય લાગે તેમ છે. ઘણા બધા સાક્ષીઓ હોવાને કારણે સમય લાગે એમ છે.’ શું આ બહાનું નથી? બીજા કોઈ આરોપી માટે સરકારે આવી દલીલ ક્યારેય કરી છે? [6] ‘જયસુખ પટેલ જેલમાં રહેવાથી ઉદ્યોગો પર અસર પડી રહી છે.’ જો આ દલીલ સ્વીકારીએ તો કોઈ ગુનેગાર ઉદ્યોગપતિને જેલમાં રાખી શકાય નહીં ! શું જયસુખ પટેલના કુટુંબીજનો ઉદ્યોગ ચલાવી ન શકે? આ દલીલ મુજબ તો કોર્પોરેટ બાપુ આશારામને પણ જેલમુક્ત કરવો જોઈએ, જેથી તે પોતાનો ઉદ્યોગ ચલાવી શકે ! શું ગુજરાત સરકાર શરમ-સંકોચ એક બાજુએ મૂકીને, ધનવાન ઉદ્યોગપતિને જેલમુક્ત કરવા ઉત્સુક બની ગઈ નથી?rs