રાજકોટ એઇમ્સ ખાતે વિશ્વ યોગ દિવસની ઉજવણી – ૬૦૦ થી વધુ આરોગ્ય કર્મીઓ ઉત્સાહભેર જોડાયા

તા.૨૨ જૂન

વાત્સલ્યમ્ સમાચાર

અમુ સિંગલ જેતપુર

“યોગા ફોર કાર્ડિયોવાસ્ક્યુલર હેલ્થ” અને ”મેડિટેશન: હાર્ટફુલનેસ” ઓનલાઈન સત્રો યોજાયા

રાજકોટના પરાપીપળીયા નજીક આવેલી ઓલ ઈન્ડિયા ઈન્સ્ટીટ્યુટ ઓફ મેડિકલ સાયન્સ (AIIMS), ખાતે ૨૧ જૂન, ૨૦૨૩ ના રોજ ૯ મા આંતરરાષ્ટ્રીય યોગ દિવસની ઉજવણી ઉત્સાહભેર કરવામાં આવી હતી.

આંતરરાષ્ટ્રીય યોગ દિવસની થીમ “એક વિશ્વ, એક સ્વાસ્થ્ય” અન્વયે વિવિધ કાર્યક્રમોનું આયોજન કરવામાં આવ્યું હતું. ફેકલ્ટી અને રહેવાસીઓ માટે સવારના યોગ અને ધ્યાન સત્રો યોજાયા હતા, ત્યાર બાદ એમ.બી.બી.એસ.ના વિદ્યાર્થીઓ, નર્સિંગ ઓફિસર્સ અને એઇમ્સ રાજકોટના અન્ય સંલગ્ન સ્ટાફ માટે અલગ-અલગ સત્રો યોજાયા હતા.

એઈમ્સ મદુરાઈના ડો. સેંથિલ કુમાર દ્વારા “યોગા ફોર કાર્ડિયોવાસ્ક્યુલર હેલ્થ” અને ડો. અરવિંદ પાલ તોમર દ્વારા ‘‘મેડિટેશન: હાર્ટફુલનેસ’’ વિષય પરના બે ઓનલાઈન સત્રો પણ યોજાયા હતા. આ પ્રવૃત્તિની શૃંખલામાં ડો. ગૌરાંગની ટીમના પ્રમાણિત યોગ પ્રશિક્ષકો દ્વારા બે ઓનલાઈન યોગ સત્રો પણ યોજવામાં આવ્યા હતા. એઇમ્સ રાજકોટના તમામ સ્ટાફ આ સત્રો અને યોગાસનમાં સામેલ થયા હતા. અંતિમ કાર્યક્રમમાં વિવિધ યોગાસનો જેવા કે તાડાસન, વૃક્ષાસન, ઉત્તાનપાદાસન, પવનમુક્તાસન વગેરેનું પ્રદર્શન અને હાર્ટફુલનેસ પર સત્ર યોજાયા હતા.

શિબિરના મુખ્ય અતિથિ એક્ઝિક્યુટિવ ડાયરેક્ટર ડૉ. (કર્નલ) CDS કટોચે પ્રેરણાદાયી સંબોધન કરતા જણાવ્યું હતું કે યોગ એ નાના પગલાઓ છે, મોટી છલાંગો નથી પરંતુ તે આપણામાં સૌથી સ્થાયી ફેરફારો લાવે છે. તેમણે સ્વસ્થ જીવનશૈલી અને પસંદગીના મહત્વ પર ભાર મૂક્યો અને કેવી રીતે યોગિક પ્રેક્ટિસ દરેકને વધુ ઉત્પાદક અને હળવા જીવન જીવવામાં મદદ કરી શકે છે, તે સમજાવ્યું હતું.

કર્નલ પુનીત કુમાર અરોરાએ એઈમ્સ રાજકોટ પરિવારના તમામ સભ્યોએ યોગ સત્રમાં ઉત્સાહ દર્શાવ્યો તે બદલ સૌનો આભાર માન્યો હતો. કાર્યક્રમના અંતે ધ ઈન્ટરનેશનલ યર ઓફ મિલેટ્સ, ૨૦૨૩ના સમર્થનમાં દરેકને તંદુરસ્ત બાજરી આધારિત નાસ્તો પીરસવામાં આવ્યો હતો.

શિબિરમાં અતિથિ વિશેષ ડૉ. (મેજર) શશી કટોચ સહિત ડોક્ટર્સ, મેડિકલ વિદ્યાર્થીઓ, આરોગ્ય કર્મીઓ મળી ૬૦૦ જેટલા લોકો ભાગ લીધો હતો.