યુનાઇટેડ સ્ટેટ્સ અને બ્રિટને શનિવારે યમનમાં હુથી બળવાખોરોની 30 થી વધુ જગ્યાઓ પર હુમલો કર્યો. આ હુમલા ઈરાન સમર્થિત જૂથોને નષ્ટ કરવા માટે કરવામાં આવી રહ્યા છે. અગાઉ, અમેરિકાએ ઈરાક અને સીરિયામાં ઈરાની ચોકીઓ પર ડઝનબંધ હવાઈ હુમલા કર્યા હતા જેમાં અનેક લોકોના મોટ થયા હતા. જોકે, અમેરિકા અને ઈરાને હજુ સુધી મૃત્યુઆંક અંગે કોઈ માહિતી શેર કરી નથી.
ગયા અઠવાડિયે જોર્ડનમાં ડ્રોન હુમલામાં ત્રણ અમેરિકન સૈનિકોના મોત બાદ અમેરિકા આ જવાબી કાર્યવાહી કરી રહ્યું છે. અમેરિકાએ પહેલાથી જ હુમલાને લઈને ચેતવણી જાહેર કરી દીધી હતી. યુએસ સેન્ટ્રલ કમાન્ડ (સેન્ટકોમ) અનુસાર, સ્થાનિક સમય અનુસાર સાંજે 4 વાગ્યે (શુક્રવારે IST 2:30 વાગ્યે), તેના દળોએ ઇરાક અને સીરિયામાં IRGC કુદ્સ ફોર્સ અને સંલગ્ન મિલિશિયા જૂથો પર હવાઈ હુમલા કર્યા.
યુએસ સૈન્ય દળોએ 85 થી વધુ લક્ષ્યો પર હુમલો કર્યો, જેમાં યુએસ તરફથી મોકલવામાં આવેલા લાંબા અંતરના બોમ્બર સહિત ઘણા વિમાનોનો સમાવેશ થાય છે.
સેંટકોમે જણાવ્યું હતું કે હુમલામાં કમાન્ડ એન્ડ કંટ્રોલ ઓપરેશન સેન્ટર્સ, ઇન્ટેલિજન્સ સેન્ટર્સ, રોકેટ અને મિસાઇલ અને માનવરહિત એરિયલ વ્હીકલ સ્ટોરેજ, મિલિશિયા જૂથોના લોજિસ્ટિક્સ અને દારૂગોળો સપ્લાય ચેઇન સેન્ટર્સ અને તેમના IRGC પ્રાયોજકોનો સમાવેશ થાય છે.
યુએસ ડિફેન્સ સેક્રેટરી લોયડ ઓસ્ટીને કહ્યું હતું કે આ હુમલા સાત કેન્દ્રો પર કરવામાં આવ્યા હતા જેનો ઉપયોગ યુએસ સેના પર હુમલો કરવા માટે આઈઆરજીસી અને સહયોગી મિલિશિયા દ્વારા કરવામાં આવે છે. તેમણે કહ્યું, “આ અમારી પ્રતિશોધાત્મક કાર્યવાહીની શરૂઆત છે. રાષ્ટ્રપતિએ યુએસ અને ગઠબંધન દળો પરના હુમલાઓ માટે IRGC અને સંલગ્ન મિલિશિયાને જવાબદાર રાખવા માટે વધારાની કાર્યવાહીનો નિર્દેશ આપ્યો છે.
ઑસ્ટિને કહ્યું, “અમારી પસંદગીના સમયે અને સ્થાનો પર હુમલા કરવામાં આવશે. અમે પશ્ચિમ એશિયા અથવા અન્ય કોઈ જગ્યાએ સંઘર્ષ નથી ઈચ્છતા, પરંતુ રાષ્ટ્રપતિ અને હું અમેરિકન દળો પરના હુમલાને સહન નહીં કરીએ. અમે અમેરિકા, અમારા દળો અને અમારા હિતોના રક્ષણ માટે કોઈપણ જરૂરી પગલાં લઈશું.
