મંડી: હિમાચલ પ્રદેશના મંડી જિલ્લામાં ફોર લેન બનાવવાના કારણે બાલીચોકી સબ-ડિવિઝન હેઠળનું થલૌટ ગામ નિર્જન બની ગયું છે. ગામના 35 મકાનો સાવ ખાલી થઈ ગયા છે અને તેમાં રહેતા લોકો ઈચ્છા ન હોવા છતાં પોતપોતાના બોરીયા બિસ્તર લઈને ભાડાના મકાનોમાં રહેવા જવા મજબૂર બન્યા છે.
અસરગ્રસ્ત દેવી સિંહ, બલદેવ ઠાકુર અને પ્રેમ સિંહ ઠાકુરે જણાવ્યું હતું કે તેમના ગામમાં આ દુર્ઘટના ફોર લેન બનાવવા માટે ખોટા કટીંગનું પરિણામ છે. લગભગ દોઢ વર્ષ પહેલા તેમના આખા ગામ અને ઘરોમાં તિરાડો દેખાવા લાગી હતી.ત્યારે પ્રશાસને અને અન્ય લોકોએ સ્થળ પર આવીને મોટી મોટી વાતો કરી હતી પરંતુ બાદમાં કોઈ ઉકેલ આવ્યો ન હતો. હવે પરિણામ એ આવ્યું છે કે આખું ગામ ધરાશાયી થવાના આરે પહોંચી ગયું છે. આ વખતે જે આફત આવી છે તેમાં વહીવટી તંત્ર પણ તેમની હાલત પૂછવા આવ્યું નથી. તેમણે સરકારને મદદ માટે વિનંતી કરી છે.
ગ્રામજનો આક્ષેપ કરે છે કે ફોરલેનના ખોટા કટીંગને કારણે તેમના ગામના તમામ ઘરોમાં મોટી તિરાડો પડી ગઈ છે અને મકાનો રહેવા યોગ્ય સ્થિતિમાં નથી. મકાનોની હાલત એવી થઈ ગઈ છે કે ગમે ત્યારે આખું ગામ ધરાશાયી થઈ શકે છે. આવી સ્થિતિમાં થલૌટ ગામના અસરગ્રસ્ત લોકોએ અહીંથી હિજરત કરી છે અને થલૌટ બજાર અને આસપાસમાં ભાડે રૂમ લઈને રહેવાનું શરૂ કર્યું છે.
અસરગ્રસ્ત ચમારી દેવીએ જણાવ્યું કે તેનો આખો પરિવાર બેઘર થઈ ગયો છે. રસોઈ બનાવવા માટે પણ જગ્યા બચી નથી. અમારે ઘર છોડીને બીજી જગ્યાએ જવું પડશે કારણ કે ભયના કારણે અહીં રહેવું શક્ય નથી. અમે સરકાર પાસે પૈસા નથી માગતા, અમને જમીન આપો અને તેના પર અમે ઘર બનાવી લઇશું.
એસડીએમ બાલીચોકી મોહન લાલ શર્માએ જણાવ્યું કે એનએચએઆઇ દ્વારા ગ્રામજનોની સમસ્યાઓ નિરીકરણ લાવવાના પ્રયાસો કરવામાં આવી રહ્યા છે. પોતે ગામમાં જઈને લોકોના રહેવા-જમવાની વ્યવસ્થા તપાસી હતી. કોઈને કોઈ ફરિયાદ નથી. એનએચએઆઇ (National Highways Authority of India) સાથે જિલ્લા વહીવટીતંત્રનો પત્રવ્યવહાર ચાલુ છે અને ટૂંક સમયમાં ઉકેલ મળી જશે. ઉલ્લેખનીય છે કે 2014માં થલૌટ ગામમાં લારજી ડેમનું પાણી છોડવાથી હૈદરાબાદના 30 વિદ્યાર્થીઓ ડૂબી ગયા હતા.
