જિલ્લા ચૂંટણી અધિકારી શ્રી પ્રભવ જોશી દ્વારા રાજકોટ બેઠકના પરિણામની વિધિવત જાહેરાત
૦૦૦
રાજકોટ, તા. ૪ જૂન –
૧૦-રાજકોટ લોકસભા બેઠકની ચૂંટણીમાં ભાજપના ઉમેદવાર શ્રી પરશોત્તમભાઈ રૂપાલા વિજેતા જાહેર થયા છે. જિલ્લા ચૂંટણી અધિકારી શ્રી પ્રભવ જોશી દ્વારા આજે સાંજે કણકોટ સરકારી એન્જિનિયરિંગ કોલેજના મતગણતરી કેન્દ્ર ખાતે રાજકોટ લોકસભા બેઠકના પરિણામની વિધિવત ઘોષણા કરવામાં આવી હતી. આ સાથે વિજેતા ઉમેદવાર શ્રી પરશોત્તમભાઈ રૂપાલાને કલેક્ટરશ્રીએ પ્રમાણપત્ર એનાયત કરવામાં આવ્યું હતું.
રાજકોટ લોકસભા બેઠકની ચૂંટણીના ૧૨,૬૦,૭૭૮ મતોની આજે ગણતરી કરવામાં આવી હતી. જેમાં ભાજપના પરશોત્તમભાઈ રૂપાલાને ૮,૫૦,૮૪૬ મત મળ્યા છે, જ્યારે કોંગ્રેસના પરેશ ધાનાણીને ૩,૬૮,૯૬૪ મત મળ્યા છે. ઉપરાંત અન્ય ઉમેદવારો ચમનભાઈ સવસાણીને ૧૦૩૫૬, અજાગિયા નીરલભાઈ અમૃતલાલને ૩૬૭૪, જીજ્ઞેશભાઈ મહાજનને ૧૩૨૨, ઝાલા નયન જે.ને ૨૩૨૧, પ્રકાશ ગોવિંદભાઈ સિંધવને ૨૩૫૫, ભાવેશ ઉપેન્દ્રભાઈ આચાર્યને ૨૮૦૬, ભાવેશભાઈ કાંતિલાલ પીપળીયાને ૨૮૪૬ મત મળ્યા છે. જ્યારે નોટામાં ૧૫૨૮૮ મત પડ્યા હતા.
પરિણામની જાહેરાત બાદ જિલ્લા ચૂંટણી અધિકારી શ્રી પ્રભવ જોશીએ વિજેતા ઉમેદવાર શ્રી પરશોત્તમભાઈ રૂપાલાને ખાસ ઓબ્ઝર્વર શ્રી નરહરિસિંઘ બાંગર, અધિક જિલ્લા ચૂંટણી અધિકારી શ્રી એન.કે.મુછાર તથા શ્રી એસ. જે. ખાચર, એ.આર.ઓ. શ્રી વિમલ ચક્રવર્તી, એ.આર.ઓ.શ્રી સિદ્ધાર્થ ગઢવીની ઉપસ્થિતિમાં પ્રમાણપત્ર એનાયત કર્યું હતું.
આ તકે રાજ્યસભાના સાંસદો શ્રી રામભાઈ મોકરિયા, શ્રી કેસરીદેવસિંહ ઝાલા, ધારાસભ્ય ડૉ. દર્શિતાબહેન શાહ, અગ્રણી ડૉ. ભરતભાઈ બોઘરા, શ્રી મુકેશભાઈ દોશી વગેરે ઉપસ્થિત રહ્યા હતા અને શ્રી પરશોત્તમભાઈને વિજયના અભિનંદન પાઠવ્યા હતા.
